“قال الإعلامي د. عمرو الليثي في برنامج أبواب الخير عبر أثير إذاعة راديو مصر ” ربنا دايمًا بيعاملك زي ما بتعامل الناس. من ستر مسلمًا… ستره الله. من يسر على معسر… يسر الله عليه في الدنيا والآخرة. من تتبع عورة أخيه… تتبع الله عورته. أنفق يا ابن آدم… ينفق عليك. والله في عون العبد… ما كان العبد في عون أخيه. وان الراحمون… يرحمهم الله. علشان كده، عامل الناس كويس؛ لأن كل ده بيترد لك من غير ما تحس.”
واضاف الليثي
– من العبارات الجميلة التي احبها : “إن الله إذا أحب عبدًا كشف له حقيقة من حوله.”
يعني لما ربنا يلاقي قلبك طيب ونفسك نقية وماشي في الدنيا بنية الخير والسلام… بيحبك لدرجة إنه ما يرضاش يسيبك مخدوع في ناس حواليك بتستغلك وأنت فاكرهم سند.
ربنا بيحبك فبيكشفلك وشوش الناس على حقيقتها. ولما بتنكشف لك الحقيقة، مش معناها إنك فشلت في اختيار الناس، لكن معناها إنك تحت عين ربنا وبيفتح عينيك حتى لو الحقيقة صعبة.
وتابع لو خسرت ناس بعد ما ظهرت لك حقيقتهم… ماتزعلش؛ لأن خسارتهم… مكسب، وكشفهم… رحمة. واللي راح… كان لازم يروح علشان تفضل جواك مساحة تانية لناس تستاهل تكون موجودة في حياتك.
على جانب آخر، أشار الليثي:
– عارفين مين أصحاب البركة الخفية في حياتنا؟ كبار السن!
اللى بيكونوا أحوج من الأطفال في التدليل والاسترضاء والحنان والرفق والرحمة والصبر.
كبار السن اللي فقدوا حيوية الشباب وعافية الجسد، واللى فقدوا كثير من أصحابهم وبقت قلوبهم منكسرة وكلها أحزان.
كبار السن اللى بقوا عايشين في صالة انتظار الرحيل.
ووجه الليثي الدعوة ..”الكبار دول محتاجين بسمة في وشوشهم، وكلمة حلوة في ودانهم، وايد حنينة تتمد ليهم.
كبار السن الآن سيرحلون، وبعد سنين حتكون أنت واحد منهم. وهم قريبون جدًا من الله ودعاؤهم أقرب للقبول.
فاغتنموا الفرصة واستفيدوا من دعواتهم الحلوة.
_سلامًا على كبار السن، ولمن يراعوهم، واكرموهم وصبروا عليهم. رب ارحمهم كما ربونا صغارًا.
يذاع برنامج أبواب الخير في الثالثة مساء الأحد والإعادة يوم الاثنين 12 الي الواحدة ظهراً بإذاعة راديو مصر
