كشف مصدر مسئول، موثوق به في وزارة التربية والتعليم ، ومسئول آخر داخل الكنترول الرئيسي بالقاهرة، أن كواليس الساعات الاخيرة قبل اعلان نتيجة الثانوية العامة 2026 ، وخريطة تصحيح أوراق امتحانات الثانوية العامة ومراجعة الدرجات هي على النحو التالي :
= التصحيح انتهى أمس الأحد.. لتبدأ مرحلة إعداد النتيجة.
= مرحلة إعداد النتيجة دي قصة لوحدها.. وتحتاج على الأقل ٤٨ ساعة.. بنقول على الأقل ٤٨ ساعة.. وعايز أفهمك واحدة واحدة إيه اللي بيحصل علشان تبقى عندك المعلومة عن فهم.. مش اللي هيقولك كلمتين ويجري.
= من الليلة نقدر نقول هيحصل بدء تجميع نتيجة الثانوية العامة وفيها: تدقيق بيانات الطلاب.. ودي بتحصل قبل وبعد التصحيح كمان.. لأنه فيه عدد كبير من الطلبة كاتب بيانات غلط.. وبقول كأحمد حافظ إن دي معلومة مش تحليل.. فيه طلبة كتير كتبت بياناتها غلط.. وتدقيق البيانات هنا أهم مرحلة علشان يتم تسكين الدرجة للطالب بشكل صحيح.. في كل مادة وكل المواد.
مرحلة تجميع نتيجة الثانوية العامة
= طيب وبعد المراجعة؟. بتبدأ مرحلة تجميع النتيجة.. وتطبيق قواعد المراجعة النهائية (درجات الرأفة) ودي مرحلة برضو مهمة جدا للطلبة اللي يستحقوا درجات رأفة وكانوا واقفين على كام درجة للنجاح.
= عندك في المرحلة دي بيحصل حصر كامل لمحاضر الغش للغشاشين واللي اتمسكوا بهواتف وسماعات علشان يتطبق عليهم الرسوب وحجب النتيجة.
= عندك مراجعة لبيانات الطلاب المتغيبين.. غابوا في كام مادة وحضروا كام مادة وهكذا.
تسكين درجات المقالي على درجات البابل شيت
= والمهم التأكد من تسكين درجات المقالي على درجات البابل شيت في كل مادة بشكل صحيح لكل طالب.. ودي مرحلة من مراحل المراجعة النهائية.. وبنتكلم في تسكين درجات قرابة مليون طالب بدون خطأ واحد.
= ثم ترتيب الطلبة على السيستم لكل كنترول لوحده ثم ترتيب عام لـ أوائل الجمهورية.
= دي مرحلة التفاصيل الصغيرة اللي بيتحدد عليها مصير مليون طالب.. والغلطة فيها بفورة زي ما بيقولوا لكن إن شاء الله مش هيحصل غلطة واحدة لأن الرجالة المختصين في المرحلة دي مش شاغلين بالهم بأي حاجة بتتكتب على السوشيال ميديا وقافلين على نفسهم ضبة ومفتاح.
= بالمناسبة الطالب اللي ورقته فيها أي خطأ في البيانات.. الاسم والتظليل ورقم الجلوس ورقم النموذج وكل ده.. بيتراجع مرة واتنين وتلاتة قبل وبعد التصحيح والبيانات الغلط بتتعدل يعني متقلقش ولا تبقى قاعد خايف.. اطمن
= احسب من دي الوقت ٤٨ ساعة على الأقل ..
